के भयो नेकपा शिर्ष नेताको चन्द्रागरि गुप्तबासमा?

०७५ सालको अन्त्य हुनै लाग्दा सत्तारुढ नेकपाको राजनीतिमा एकाएक नयाँ तरङ्ग आयो ।तरङ्ग यसकारण कि तत्कालीन दुई पार्टीबीच एकीकरण घोषणाको ११ महिना बितिसक्दा पनि तल्लो तहसम्म एकता टुङ्गिन सकेको छैन ।

जसले गर्दा नेकपाका नेता कार्यकर्तामा निराशा बढेको छ । यस्तो अवस्थामा अचानक अध्यक्षद्वय केपी शर्मा ओली र पुष्पकमल दाहाल प्रचण्ड ‘गोप्य’ बैठकका लागि चैत २८ गते चन्द्रागिरी पुगे ।

अध्यक्षद्वयसँगै पार्टी महासचिव विष्णु पौडेल र सचिवालय सदस्य रामबहादुर थापा बादल पनि चन्द्रागिरी हिल्स पुगेका थिए । चार नेताबाहेक सचिवालयका अन्य नेतालाई बैठकबारे जानकारी थिएन । एकता प्रक्रिया नटुङ्गिँदा नेता कार्यकर्तामा निरासा बढिरहेका बेला अचानक तय भएको गोप्य बैठकले एकताका बाँकी काममा ‘ब्रेक थ्रु’ गर्ने चर्चा पनि चल्यो । नेकपाकै नेताहरुले उक्त बैठकलाई चासोका साथ हेरेका थिए ।

तर बैठकमा सहभागी एक नेताले आफू निकटका नेतालाई बताएअनुसार उक्त आवसीय बैठकमा महासचिव पौडेल र सचिवालय सदस्य बादलले एकीकरणको खाका पेश गरेका थिए ।

सचिवालय सदस्य बादल एकता प्रक्रियाका कामको गृहकार्यका लागि स्थायी कमिटीले गठन गरेको ९ सदस्यीय कार्यदलका संयोजक थिए । महासचिव पौडेल पनि कार्यदलका सदस्य थिए । यी दुई नेता रहेको दुई सदस्यीय कार्यदलले प्रदेश कमिटी सदस्यहरूको नामावली पनि तयार गरेको थियो ।

चन्द्रागिरीको आवासीय बैठकमा पौडेल र थापाले आफूले पेश गरेको खाकामा लामो ब्रिफिङ गरेका थिए । झण्डै २३ घण्टा चन्द्रागिरी बिताएका अध्यक्षद्वयले दुई नेताको ब्रिफिङ सुन्नेबाहेक कुनै निर्णय गरेनन् । अर्थात बाहिर चर्चामा आए जस्तो उक्त आवासीय बैठकले एकताको गाँठो फुकाउन सकेन । बैठकमा पौडेल र थापाले पेश गरेको खाकामा रहेर वरिष्ठ नेता माधवकुमार नेपालसँग अध्यक्षद्वयले छलफल गर्ने सहमति भएको थियो ।

ती नेताका अनुसार बैठकमा जिल्ला नेतृत्वको विषयबाहेक राजनीतिक प्रतिवेदन बारे पनि सामान्य छलफल भएको थियो ।चन्द्रागिरी जानुपूर्व अध्यक्षद्वयले सचिवालयका शीर्षस्थ नेताहरूसँग बेग्लाबेग्लै परामर्श गरेका थिए । बिहीबार अपराह्न ५ बजे चन्द्रागिरी हिल्स पुगेका ओली–प्रचण्ड शुक्रबार ४ बजे फर्किएका थिए ।

नेकपामा यसअघि नै जिल्ला नेतृत्वको भागबन्डा गर्दा तत्कालीन एमालेबाट अध्यक्ष भए तत्कालीन माओवादीबाट सचिव हुने र तत्कालीन माओवादीले अध्यक्ष लिएको ठाउँमा तत्कालीन एमालेबाट सचिव हुने सहमति भइसकेको छ ।

चन्द्रागिरीको गोप्य बैठकमा पनि जिल्ला र राजनीतिक प्रतिवेदनबारे छलफल भए पनि जनवर्गीय सङ्गठनको भागबन्डा, केन्द्रीय सदस्यको कार्यविभाजन, पोलिटब्युरो गठन, केन्द्रीय विभाग गठन लगायतका विषयमा नेताहरुले कुनै छलफल नगरेको ती नेताले बताए ।

वैशाख ९ गते जिल्ला तहको एकता टुङ्ग्याउने सामान्य सहमति भए पनि वरिष्ठ नेता नेपाल कन्भिन्स नभएसम्म एकता टुङ्गिने सम्भावन कम रहेको सचिवालयका एक नेताले  बताए ।

झन्डै एक वर्षदेखि एकता प्रक्रिया अल्झिएकाले अध्यक्ष ओली र प्रचण्डले कम्युनिस्ट पार्टी स्थापना दिवस (आगामी ९ वैशाख) भित्रै सबै काम टुङ्ग्याउने बताउँदै आएका छन् । यसैअनुसार दुई अध्यक्षले संवाद बाक्लो बनाएका छन् ।सोही सहमतिअनुसार सोमबार अध्यक्षद्वयले नेता नेपालसँग दुई चरणमा छलफल गरेका छन् । तर छलफल सकारात्मक नभएको बालुवाटार स्रोतले बतायो ।

जिल्ला तहको एकतामा वरिष्ठ नेता नेपाललगायत नेताहरूले भने पोलिटब्युरो गठनपछि केन्द्रीय सदस्यहरूको कार्यविभाजन गर्नुपर्ने, जिल्ला नेतृत्व मापदण्डका आधारमा टुङ्ग्याउनुपर्ने अडान राख्दै आएका छन् ।सोमबार नेता नेपालसँगको परामर्शमा चन्द्रागिरीमा पौडेल र थापाले पेश गरेको सूचीबारे छलफल भएको थियो । तर एकताको निष्कर्षमा नेताहरु पुग्न सकेनन् ।
के भयो नेकपा शिर्ष नेताको चन्द्रागरि गुप्तबासमा

प्रतिक्रिया

सम्बन्धित समाचार